Karanasan, mga pananaw at kwentong buhay
Naiinip ako na sa WordPress 3.1 at sa mga themes na gagamit ng mga post formats. Maganda naman itong Twenty Ten theme pero hindi ko masyado trip gamitin ito kaya sana lang, sana please meron nang ibang theme na gumagamit ng post_formats ng WP 3.1
Nakakatuwa at nakita ko ang Almost Spring theme na ito. Isa sa mga paborito na klasikong themes para sa WordPress. Una ko itong nagamit noong 2006 kung kailangan kakasimula ko pa lang sa blogging.
Simple lang ang mga themes noon. Wala masyado kaek-ekan tulad ng custom hooks, featured posts, mga image thumbnails. Wala. Deretso ang atensyon mo sa pagsusulat ng post.
Hindi naman sa sinasabi kong pangit ang mga features na iyon, iba pa rin talaga kapag mga ganitong klasikong disenyo ang ginagamit mo paminsan-minsan.
Ang nakakainis sa aking sarili ay kung kailan ako inaantok saka dumarating ang malakas na motibasyon para magsulat. Bukod sa motibasyon, dumadagsa din ang madaming ideya o paksang gustong kong isulat.
Pero dahil nga sa inaantok na ako, hindi ko na nagagawang isulat ang mga ideyang pumasok sa aking isipan at ang motibasyon kong magsulat ay natatalo ng pangungulila ng aking katawan sa malambot na higaan.
Minsan nga ay naiisip kong subukan 'yung tinatawag nilang "power naps" o maiiksing pagtulog - mga 30 minuto - saka muli gigising at ipagpapatuloy ang naudlot o bagong gawain, tulad ng pagsusulat. Pero palpak ako sa "power naps" dahil ang dapat sana'y 30 minutong pagtulog ay nagiging 6 hanggang 8 oras na pagkakaidlip!
Sa katunayan, ang artikulong ito ay sinusulat ko habang nasa bingit ako ng matinding pagkaantok at hinahayaan ko na lang ang aking mga kamay na tumipa sa aking laptop sa saliw ng kumpas ng aking isipan.
Pero hindi tungkol sa reaksyon ko sa huling pamamaalam ni Gloria Macapagal-Arroyo bilang pekeng Pangulo ng Pilipinas ang naisulat ko. Bagkos, ang pakiramdam ng pagsusulat habang kalahating tulog at kalahating gising.
Humahataw talaga ang TV5 ngayon. Bukod sa pagdagsa ng mga batikang artista na pinabayaan ng mga GMA 7 at ABS-CBN Channel 2 sa istasyong ito, may ilang mga palabas na sadyang nakakahuli sa interes ng mga manonood.
Pursigido kasi si Manuel V. Pangilinan na palaguin ang istasyong ito at maging Numero Uno sa buong bansa. Ang dagdag na 5 bilyong pisong pamumuhunan o investment ay senyales na seryoso talaga siya.
Ang magandang bunga nito, may alternatibo na sa GMA 7 at ABS-CBN na minsan naman talaga'y nakakasawa na at nakakainis lang ang kompetisyon nilang dalawa.
Pero ang pinaka-ikinatutuwa ko sa balitang ito ay ibabalik daw ng TV5 ang paborito kong programa sa telebisyon noong nasa elementarya pa lang ako, ang walang kaparis na "Batibot".
Nagsimula ito noong 1984 bilang Sesame! o Filipinong bersyon ng "The Sesame Street" na sikat noon sa Amerika. Hanggang sa naging 100% Filipino ito sa wika at laman at tawaging "Batibot" na ang ibig sabihin ay "small, but strong and robust" o maliit ngunit malakas at matikas.
Hindi malilimutan ang mga karakter sa Batibot, lalo na sina Pong Pagong at Kiko Matsing. Ang mga kwento ni Kuya Bodjie na talagang inaabangan tuwing umaga.
At shempre, hinding-hindi malilimutan ang panimulang kanta ng Batibot na siyang kinakanta ng lahat ng bata sa bansa tuwing umaga:
Ito at "Ang Huling El Bimbo" ng Eraserheads ang kabilang sa mga kantang hinding-hindi ko malilimutan.
Sana ngayong bakasyon maibalik ng TV5 ang Batibot para kahit papaano ay mapanood ko ito at makita kung anong pagbabago ang ginawa nila dito. Sana bumalik ang mga orihinal na puppet at mga karakter lalo na si Kuya Bodjie. At sana tumagal ito sa ere hanggang sa magkaroon ng muwang ang aking anak para mapanood niya rin ito.
Tayo na sa Batibot!
Ubod ng mahal ang tiket sa concert na John Mayer Live in Manila. Gaganapin ito sa May 16, 2010 sa Mall of Asia Concert grounds. Ito ang halaga ng mga tikets:
VIP - 12,000 pesos
Gold - 8,000 pesos
Silver - 5,000 pesos
Bronze - 2,000 pesos
GA - 600 pesos
Hindi ko kayo niloloko, at sana ay nagkamali ako ng pagbabasa, pero ganyang kamahal ang mga tiket sa concert na ito. Fan ako ni John Mayer, tunay na gusto ko ang mga kanta niya, pero hindi ako maglalabas ng ganyang kalaking pera para lamang mapanood siya ng Live.
Sa VIP at Gold na tiket ay pwede ka nang mag-enrol sa DLSUD o kaya ay may bagong cellphone ka na. Ok lang din sana kung sa ganoong tiket ay makakaupo ako ng komportable, may aircon at bubong kung sakaling umulan. Pero ito ay gaganapin sa MOA concert grounds, walang upuan, walang bubong at nakatayo ako sa kabuuan ng concert. Parang hindi ata makatarungan ang ibabayad ko, mawalang-galang na kay John Mayer, pero sa susunod na lang.
Manood ba kayo ng concert niya? Anong tiket ang bibilhin nyo?